• Ընկեր ըլլալ կը նշանակէ միշտ միասին ըլլալ:

Հոս կարելի է հարցնել թէ միշտ միասին ըլլալու եւ ընկեր ըլլալու միջեւ ի՞նչ յարաբերութիւն կայ: Օրինակ՝ «Բոլոր այն անձերը որոնց հետ դպրոցն էք ամբողջ օրը ձեր ընկերնե՞րն են»հարցումով կարելի է խօսիլ ժամանակի եւ բարեկամութեան միջեւ կապակցութեան մասին:

• Ընկեր ըլլալ կը նշանակէ իրար չվշտացնել:

Կարելի է հարցնել թէ «Ո՞ր պարագաներուն կը վշտացնենք անձ մը: Չի՞ կրնար պատահիլ օրինակ որ երբեմն իրեն լաւութեան համար բաներ ըսենք կամ ընենք, գիտնալով հանդերձ թէ մեր ընկերը պիտի վշտացնենք»:

• Մէկու մը հետ ընկեր ըլլալ կը նշանակէ նոյն բաներէն հաճոյք զգալ:

Այս հարցումներով կարելի է խորացնել քննարկումը. «Բարեկամութեան համար անհրաժեշտ կամ բաւարա՞ր են նոյն երա­ժշտութիւնը մտիկ ընել, նոյն կերակուրը սիրել, նոյն անձերէն հաճոյք զգալ», «Տարբեր հետաքրքրութիւններ ունեցող անձերը ընկեր չե՞ն կրնար ըլլալ», «Կա՞ն անձեր, որոնց հետ նոյն բաներէն կ՚ախօրժիք, սակայն ընկեր չէք կրնար ըլլալ»։

• Բարեկամութիւն կը նշանակէ գաղտնիք պահել:

Հետեւեալ հարցումներով կարելի է արծարծել գաղտնիքի գաղափարը. «Պէ՞տք է ամեն գաղտնիք պահել: Օրինակ եթէ ձեր ընկերը կամ բարեկամը ուրիշի մը վնաս հասցնէ եւ ըրածը ձեզի խոստովանի որպէս գաղտնիք, այդ գաղտնիքը պահելը բարեկամութի՞ւն կը նշանակէ: Գաղտնիք մը պահելու սահմանը ո՞ւր կը սկսի եւ ո՞ւր կը վերջանայ»:

• Ընկեր կամ բարեկամ է ա՛ն, որ բոլոր պարագաներուն օգնութեան կը հասնի։

Հետեւեալ հարցումներով կարելի է խորացնել քննարկումը՝ «Երբ օգնութեան պէտք ունենանք, սակայն մեր ընկերը մեր քովը չգտնուի, մեր բարեկամութիւնը կը վերջանա՞յ: Օրինակի համար,  եթէ այդ միջոցին մեր ընկերը օգնութեան պէտք ունեցող ուրիշ մէկու մը օգնելով զբաղած է, մեր բարեկամութեան վրայ ինչպէ՞ս կ’ազդէ։ Կամ՝ արդեօք պէ՞տք է ազդէ», «Հապա եթէ մեր ընկերը կատու մը ըլլար…։ Կատու մը մեզի ինչպէ՞ս կրնայ օգնել»։

• Ընկեր կամ բարեկամ է ա՛ն, որ սուտ չի խօսիր։

Հոս կարելի է հարցնել թէ մարդիկ ե՞րբ սուտ կը խօսին։ Բարի նպատակով սուտ խօսիլ հնարաւո՞ր է, թէ ո՛չ: Կարելի է հարցնել՝ «Օրինակ, սեպենք թէ ձեր ընկերոջ բերած տարեդարձի նուէրը չհաւնեցաք, սակայն սիրտը չկո­տրե­լու համար՝ սուտ խօսեցաք եւ “Շատ սիրեցի” ըսիք: Այս սուտը ձեր բարեկամութեան վնաս կը պատճառէ՞»:

• Ընկեր կամ բարեկամ ըլլալ կը նշանակէ դատողական չըլլալ:

Հետեւեալ հարցումներով կարելի է խորացնել քննարկումը «Մէկու մը հանդէպ դատողական ըլլալ ի՞նչ կը նշանակէ: Ո՞ր պարագաներուն մէկու մը հանդէպ դատողական կ’ըլլանք: Երբ մեր ընկերոջ որեւէ նիւթի մը մասին իրականութիւնը ըսենք, իրեն հանդէպ դատողական եղած կը համարուի՞նք»: